حاربني الوكت..وجفوف ايديه اكصار
وشخلي المطر..بجناح فراشه...؟
فصلت الجلد..لضلوعي قطعه اقماش
ونزع جلدي الوكت..من عوز اقماشه..؟
هز مهدي الحزن..وي هزة الكاروك..
واسكت بالضرب..ماشفت خرخاشه..؟
وافرش جسد ظهري..من يحيي النوم..؟
عدل..بس لاحك الميت على افراشه..
عايش مستحه..من المستحه البلروح..
خاف تكول مات.. وعمره ماعاشه..؟
جن كرصه خبز..روحي ابحلك تنور..
تجر جلدي ابخبث..وتعوفني الماشه..؟
دمعه ابعيني شايل..من صرت لليوم..
نخرت شوف عيني..وكام يتلاشه..
دشداشه اوجه..مابدلتهن يوم..
جن لابس جفن..ماجنها دشداشه..
خلصت العمر..من باشه يهوه الموت..
وطحت ابناس اشد من سطوة الباشه